|
 Gundê Kiwaxê yê navçeya Hezexê (İdil) ya bajarê Şirnexê, ji aliyê hêzên leşkerî yên ewlekarî ve hat bombekirin.
Ji aliyê gundiyên Kiwaxê yên Êzdî ve hatiye ragihandin ku ev demek dirêj e, rayedarên leşkerî yên vê herêmê hewl dane û dixwazin ku ji gundên derûdorê cerdevanan bînin û li gundê Kiwaxê bicîh bikin. Herweha hatiye ragihandin, ji ber ku gundiyan, destûr nedaye vê helwesta hêzên leşkerî, wan jî ji bo gundiyan bidin tirsandin û revandin, li nava gund çend bombe teqandine.
Li gor ku ji aliyê ajansa nûçeyan ya firatê ve hatiye belavkirin, Gundê Kiwaxê (cîwarê Êzdiyan) yê navçeya Hezexê ya bajarê Şirnexê, di salên berê de ji aliyê hêzên leşkerî ve hatibû valakirin û piştre cerdavanê gundên derûdorê, li vî gundî hatine bicîhkirin. Li ser vê yekê, gundiyan serî li dadgehê dan û xwestin ku ew
cerdevan, ji gundê wan bên valakirin. Ji aliyê dadgehê ve biryar hat wergirtin ku cerdevan ji gund derkevin. Lê, ev du sal e ku bi tu şêweyek, nikarin cerdevanan ji gun derxin der.
Bi qasî ku hatiye bidestxistin, Qaymeqamê navçeya Hezexê û fermandarê qereqola gundê xeberliyê, 3 hefte berê serdana gund kirine û ji gundiyan daxwaz kirine ku gundê xwe bifroşin dewletê. Piştî ku ev daxwaza rayedaran, ji aliyê gundiyan ve hatiye redkirin, rayedaran gef li gundiyan xwarine û gotine, “ger hun gund nefroşin me, ev daristana dorberê gund malê dewletê ye û em ê jî, cerdevanan li wir bicîh bikin.” Gundiyan, vê pêvajoyê û gefliwanxwarina rayedaran, bi namedorek ji Parêzgarî û Wezareta Navxweyî re ragihandine.
Hatiye ragihandin ku piştî van bûyeran, çend roj li serhev li nav û derûdorên gund, çend bombe hatine teqandin daku gundiyan ji gund bidin revandin. Ji aliyê cerdevanek ve hatiye eşkerekirin ku van bombeyan, ji aliyê cerdevan Selahadin Yildirim û Kazım Bulut û fermandarê qereqola Gundê Kiwaxê berbaz Bülent ve, hatine teqandin û haya Amirlîwayê Leşkerî yê bajarê Şirnexê jî, ji teqandina van bombeyan heye.
Copyright 2007. All Rights Reserved.  |
RSS feed Comments
